ಮೊಡವೆ ಕಾಟ ಜಾಸ್ತಿಯಾದರೆ ಟೆನ್ಷನ್‌ ಬಿಡಿ ‘ಬಾಳೆಹಣ್ಣು ಸಿಪ್ಪೆ’ ಬಳಸಿ..!!

ಮೊಡವೆ, ಸಾಧಾರಣವಾಗಿ ವಯಸ್ಕರಲ್ಲಿ ಕಂಡು ಬರುವ ಒಂದು ಸಾಮಾನ್ಯ ಸಮಸ್ಯೆ ಮೊಡವೆ ಒಂದು ಸಮಸ್ಯೆಯಾದರೆ ಇದನ್ನು ಹೋಗಲಾಡಿಸುವುದು ಇನ್ನೊಂದು ರೀತಿಯ ದೊಡ್ಡ ಸಮಸ್ಯೆ ಇವುಗಳಿಂದ ಮುಕ್ತಿ ಪಡೆಯಲು ಅನೇಕರು ವಿವಿಧ ಬಗೆಯ ರಾಸಾಯನಿಕಯುಕ್ತ ಕ್ರೀಮ್ ಗಳ ಮೊರೆ ಹೋಗಿ ಅಷ್ಟೇನೂ ಯಶಸ್ಸು ಕಾಣದ ಉದಾಹರಣೆಗಳು ಸಾಕಷ್ಟಿವೆ. ಹೀಗಿರಬೇಕಾದರೆ ಮನೆಮದ್ದು ಗಳ ಮೊರೆಹೋಗಿ ಅದರಲ್ಲಿ ಯಶಸ್ಸುಕಂಡ ಅನೇಕರು ಹೇಳುವ ಮಾತುಗಳೂ ನಮ್ಮ ಕಣ್ಣ ಮುಂದಿವೆ. ಇದರಲ್ಲಿ ಒಂದು ಮನೆಮದ್ದಿನ ಸಾಲಿಗೆ ಸೇರುವ ವಸ್ತು ಎಂದರೆ ಅದು ನಾವು ಹಣ್ಣು ತಿಂದು ಅಪ್ರಯೋಜನಕಾರಿ ಮತ್ತು ಬೇಡವೆಂದು ಬಿಸಾಡುವ ಬಾಳೆಹಣ್ಣಿನ ಸಿಪ್ಪೆ.
ಹೌದು, ಬಾಳೆಹಣ್ಣಿನ ಸಿಪ್ಪೆ ಮೇಲೆ ಕಾಲಿಟ್ಟರೆ ಜಾರಿ ಬೀಳುವುದು ಖಂಡಿತ ಎಂದು ಹಲವರು ಆದರಿಂದ ದೂರವೇ ಉಳಿಯುತ್ತಾರೆ. ಆದರೆ ಅದರ ಮೇಲೆ ಕಾಲಿಡುವ ಮೊದಲು ಅದನ್ನೇ ಕೈಗೆ ತೆಗೆದುಕೊಂಡು ಸ್ವಲ್ಪ ಬುದ್ಧಿವಂತಿಗೆ ಉಪಯೋಗಿಸಿದರೆ ಅದರಿಂದ ಆಗುವ ಉಪಯೋಗ ನೀವು ಊಹಿಸಲಾಗದಷ್ಟು. ಬಾಳೆಹಣ್ಣಿನಲ್ಲಿ ದೇಹಕ್ಕೆ ಬೇಕಾಗುವ ವಿವಿಧ ಬಗೆಯ ಪೋಷಕಾಂಶ ದೊರೆತರೆ, ಅದರ ಸಿಪ್ಪೆಯಲ್ಲಿ ಆಂಟಿ – ಆಕ್ಸಿಡೆಂಟ್ ಎಂದು ಗುರುತಿಸಿಕೊಂಡ ” ಲ್ಯೂಟೀನ್ ” ಅಂಶ ಮತ್ತು ವಿಟಮಿನ್ ‘ಎ’ ಗೆ ಸಂಬಂಧಿಸಿದ ” ಕ್ಯಾರೊಟೆನೊಯ್ಡ್ ” ವಿಟಮಿನ್ ಅಂಶ ಲಭ್ಯವಿದ್ದು ಚರ್ಮ ಸಂಬಂಧಿತ ಉರಿಯೂತ (Inflammation) ದಂತಹ ಸಮಸ್ಯೆಗಳನ್ನು ಕ್ಷಣಮಾತ್ರದಲ್ಲಿ ನಿವಾರಿಸಬಲ್ಲುದು.
ಹೀಗಿರಬೇಕಾದರೆ ಮುಖದ ಚರ್ಮದ ಮೇಲೆ ಮೂಡಿ ಬಂದು ಮುಖದ ಅಂದವನ್ನೇ ಹಾಳುಮಾಡುವ ಮೊಡವೆಗಳಿಗೆ ಬಾಳೆಹಣ್ಣಿನ ಸಿಪ್ಪೆ ಒಂದು ಬಗೆಯ ಮನೆ ಮದ್ದು ಏಕಾಗಿರ ಬಾರದು? ಪ್ರಾಯೋಗಿಕವಾಗಿ ಇದು ಧೃಢಪಟ್ಟಿಲ್ಲವಾದರೂ ಒಬ್ಬೊಬ್ಬರ ಚರ್ಮ ಒಂದೊಂದು ರೀತಿ ಇರುವುದರಿಂದ ಇದು ನಿಮಗೆ ಸಹಾಯ ಮಾಡಿದರೂ ಆಶ್ಚರ್ಯ ಪಡುವ ಹಾಗಿಲ್ಲ. ಅನೇಕ ರೀತಿಯ ಕ್ರೀಮ್ ಗಳಿಗೆ ಹುಡುಕಿಕೊಂಡು ಹೋಗಿ ಹಣ ಸುರಿಯುವ ಬದಲು ಮನೆಯಲ್ಲೇ ಸುಲಭವಾಗಿ ಸಿಗುವ ಇಂತಹ ನೈಸರ್ಗಿಕ ವಸ್ತುಗಳ ಸ್ನೇಹ ಬೆಳೆಸಿಕೊಂಡರೆ ಯಾವುದೇ ಅಪಾಯವಿಲ್ಲ.

ಮೊಡವೆಗಳಿಗೆ ಬಾಳೆಹಣ್ಣಿನ ಸಿಪ್ಪೆಯಿಂದ ಚಿಕಿತ್ಸೆ ಹೇಗೆ?
ಮೊದಲಿಗೆ ನಿಮ್ಮ ಮುಖದ ಚರ್ಮವನ್ನು ಶುದ್ಧವಾದ ನೀರಿನಿಂದ ಸಾಧ್ಯವಾದರೆ ಒಂದು ಮೈಲ್ಡ್ ಕ್ಲೀನ್ಸೆರ್ ನಿಂದ ಯಾವುದೇ ಬಗೆಯ ಕೊಳೆಯ ಅಥವಾ ಎಣ್ಣೆಯ ಅಂಶ ಇಲ್ಲದ ಹಾಗೆ ತೊಳೆಯಿರಿ. ನಂತರ ಒಂದು ಶುದ್ಧವಾದ ಮತ್ತು ಮೆತ್ತನೆಯ ಬಟ್ಟೆಯಿಂದ ಮೊಡವೆಗಳಿಂದ ಕೂಡಿರುವ ಚರ್ಮದ ಭಾಗವನ್ನು ನಿಧಾನವಾಗಿ ಒರೆಸಿ. ಗಮನಿಸಿ, ಮೊಡವೆಯ ಜಾಗವನ್ನು ಎಂದಿಗೂ ಬಟ್ಟೆಯಿಂದ ಒರಟಾಗಿ ಉಜ್ಜಬೇಡಿ. ಇದರಿಂದ ಮೊಡವೆಯ ಸ್ವರೂಪ ಉಗ್ರವಾಗಿ ಸುತ್ತಲಿನ ಚರ್ಮ ಊದಿ ಕೊಂಡಂತಾಗುತ್ತದೆ.

ಯಾವ ರೀತಿಯ ಬಾಳೆಹಣ್ಣು ಮೊಡವೆಗಳಿಗೆ ರಾಮಬಾಣ?
ಮೊಡವೆಗಳ ಚಿಕಿತ್ಸೆಗೆ ಸಾಮಾನ್ಯವಾಗಿ ಮಾಗಿದ ಬಾಳೆಹಣ್ಣು ಬೇಕು. ಹಾಗೆಂದು ತೀರಾ ಹಣ್ಣಾಗಿ ಮೇಲಿನ ಸಿಪ್ಪೆಯೆಲ್ಲಾ ಕಪ್ಪಾಗಿ ಹೋಗಿರುವ ಬಾಳೆ ಹಣ್ಣಲ್ಲ ಅಥವಾ ಅಚ್ಚ ಅರಿಶಿಣ ಬಣ್ಣದ ಹಸಿರು ತುದಿ ಹೊಂದಿದ ಇನ್ನೂ ಹಣ್ಣಾಗದ ಬಾಳೆಹಣ್ಣೂ ಅಲ್ಲ. ಚುಕ್ಕೆ ಬಾಳೆ ಎಂದು ಕರೆಯಲ್ಪಡುವ ಹಳದಿ ಬಣ್ಣದ ಸಿಪ್ಪೆಯ ಮೇಲೆ ಕಪ್ಪುಚುಕ್ಕೆ ಹೊಂದಿದ ಬಾಳೆಹಣ್ಣು ಇದ್ದರೆ ಸಾಕು. ಈ ತರಹದ ಬಾಳೆಹಣ್ಣಿನಿಂದ ಮೊಡವೆ ಪೀಡಿತ ಚರ್ಮದ ಮೇಲೆ ಒರೆಸುವುದು ಸುಲಭವಾಗುತ್ತದೆ.

ಬಾಳೆಹಣ್ಣಿನ ಸಿಪ್ಪೆಯನ್ನು ತಯಾರಿಸಿಕೊಳ್ಳುವ ಬಗೆ
ಸಿಪ್ಪೆಯಿಂದ ಆರಾಮವಾಗಿ ಬಾಳೆಹಣ್ಣನ್ನು ತೆಗೆದು ತಿನ್ನಿ ಅಥವಾ ಬೇರಾವುದಾದರೂ ಚರ್ಮ ಸಂಬಂಧಿತ ಸಮಸ್ಯೆಗಳಿಗೆ ಉಪಯೋಗಿಸಲು ಎತ್ತಿಡಿ. ಈಗ ನಿಮ್ಮ ಕೈಯಲ್ಲಿರುವ ಬಾಳೆಹಣ್ಣಿನ ಸಿಪ್ಪೆಯನ್ನು ನಿಮ್ಮ ಕೈಯಲ್ಲಿ ಉಜ್ಜುವ ಹಾಗೆ ಹಿಡಿದಿಟ್ಟುಕೊಳ್ಳುವ ರೀತಿಯಲ್ಲಿ ಸಣ್ಣ ತುಂಡುಗಳಾಗಿ ಕತ್ತರಿಸಿ. ಬಾಳೆಹಣ್ಣಿನ ಸಿಪ್ಪೆಯಲ್ಲಿರುವ ಪೋಷಕಾಂಶಗಳ ಆಗರವನ್ನು ಕೇಳಿದರೆ ನಿಜಕ್ಕೂ ಆಶ್ಚರ್ಯ ಪಡುತ್ತೀರಿ. ಅದರಲ್ಲಿ ವಿಟಮಿನ್ ಗಳಾದ ವಿಟಮಿನ್ ‘ಎ’, ವಿಟಮಿನ್ ‘ಬಿ’, ವಿಟಮಿನ್ ‘ಸಿ’, ವಿಟಮಿನ್ ‘ಇ’ ಹಾಗೂ ಖನಿಜಾಂಶಗಳಾದ ಪೊಟ್ಯಾಶಿಯಂ, ಜಿಂಕ್, ಕಬ್ಬಿಣ ಮತ್ತು ಮ್ಯಾಂಗನೀಸ್ ಗಳು ಸೇರಿವೆ. ಈ ಎಲ್ಲಾ ಅಂಶಗಳ ಸಂಯುಕ್ತ ಚರ್ಮ ಉಬ್ಬಿಕೊಂಡು ಮೊಡವೆ ಉಂಟಾಗುವುದನ್ನು ಖಂಡಿತ ತಡೆಯುತ್ತದೆ.

ಬಾಳೆಹಣ್ಣಿನ ಸಿಪ್ಪೆಯಿಂದ ನಿಮ್ಮ ಚರ್ಮವನ್ನು ಉಜ್ಜಿ

ನೀವು ಮೊದಲೇ ತುಂಡಾಗಿ ಕತ್ತರಿಸಿರುವ ಬಾಳೆಹಣ್ಣಿನ ಸಿಪ್ಪೆಯನ್ನು ತೆಗೆದುಕೊಳ್ಳಿ. ಅದರ ಬಿಳಿಭಾಗವನ್ನು ಚರ್ಮದ ಕಡೆಗೆ ತಿರುಗಿಸಿ ಸುಮಾರು ಹತ್ತು ನಿಮಿಷಗಳ ಕಾಲ ನಿಮ್ಮ ಚರ್ಮದ ಮೇಲೆ ನಯವಾಗಿ ಮಸಾಜ್ ಮಾಡಿ. ಈ ಮಧ್ಯೆ ಆಗಾಗ ಸಿಪ್ಪೆಯ ಬಿಳಿ ಬಣ್ಣ ಕಪ್ಪಾಗಿದೆಯೇ ಎಂದು ಗಮನಿಸುತ್ತಿರಿ. ಸಿಪ್ಪೆ ಕಪ್ಪಾಗಿ ಕಂಡ ತಕ್ಷಣ ಅದನ್ನು ಬಿಸಾಡಿ ಬೇರೆ ಬಾಳೆಹಣ್ಣಿನ ಸಿಪ್ಪೆ ತುಂಡನ್ನು ಕೈಗೆ ತೆಗೆದುಕೊಳ್ಳಿ ಮತ್ತು ಮಸಾಜ್ ಮುಂದುವರೆಸಿ.

ಚರ್ಮಕ್ಕೆ ಸ್ವಲ್ಪ ವಿಶ್ರಾಂತಿ ಕೊಡಿ
ಇದು ಸ್ವಲ್ಪ ಹೆಚ್ಚಿನ ಸಮಯ ತೆಗೆದುಕೊಳ್ಳುವ ವಿಷಯ. ಬಾಳೆಹಣ್ಣಿನ ಸಿಪ್ಪೆಯಿಂದ ಮಸಾಜ್ ಮುಗಿದ ತಕ್ಷಣ ಮುಖ ತೊಳೆದುಕೊಳ್ಳಲು ಹೋಗಬೇಡಿ. ಕನಿಷ್ಠಪಕ್ಷ ಸಂಜೆಯವರೆಗಾದರೂ ಕಾಯುವ ತಾಳ್ಮೆ ನಿಮಗಿರಬೇಕು. ಒಂದು ವೇಳೆ ಬೆಳಗಿನ ಸಮಯದಲ್ಲಿ ಬೇರೆ ಕೆಲಸವಿದ್ದ ಪಕ್ಷದಲ್ಲಿ ಬಾಳೆಹಣ್ಣಿನ ಸಿಪ್ಪೆಯ ಮಸಾಜ್ ಪ್ರಕ್ರಿಯೆಯನ್ನು ರಾತ್ರಿ ಊಟವಾದ ನಂತರ ಮಲಗಿಕೊಳ್ಳುವ ಮುಂಚೆ ಮಾಡಿ ಇಡೀ ರಾತ್ರಿ ಮುಖದ ಚರ್ಮವನ್ನು ಹಾಗೆ ಬಿಟ್ಟು ಬೆಳಗ್ಗೆ ಶುದ್ಧವಾದ ನೀರಿನಿಂದ ಮುಖ ತೊಳೆದುಕೊಳ್ಳಬಹುದು. ಈ ರೀತಿ ತುಂಬಾ ಹೊತ್ತು ಬಾಳೆಹಣ್ಣಿನ ಸಿಪ್ಪೆಯ ಪೋಷಕಾಂಶಗಳಿಗೆ ಮುಖ ಒಡ್ಡುವುದರಿಂದ ಆ ಎಲ್ಲಾ ಪೋಷಕಾಂಶಗಳು ಚರ್ಮದಿಂದ ಹೀರಲ್ಪಡುತ್ತವೆ.

ಬಾಳೆಹಣ್ಣಿನ ತಿರುಳಿನ ಮಸಾಜ್ ಅನ್ನು ಮುಂದುವರೆಸಿ..!!
ಇದು ದಿನಕ್ಕೊಮ್ಮೆ ಮಾಡುವ ಪ್ರಕ್ರಿಯೆಯಾದುದರಿಂದ ಮತ್ತು ನೈಸರ್ಗಿಕವಾಗಿರುವುದರಿಂದ, ಫಲಿತಾಂಶ ಕಾಣಲು ಸ್ವಲ್ಪ ಸಮಯ ಹಿಡಿಯಬಹುದು. ಅಂದರೆ ಇಂದು ಮಸಾಜ್ ಮಾಡಿದರೆ ನಾಳೆ ಮೊಡವೆ ಮಾಯ ಎಂಬಂತಲ್ಲ ಅಥವಾ ದಿನ ಬಿಟ್ಟು ದಿನ ಬಾಳೆಹಣ್ಣಿನ ಸಿಪ್ಪೆಯ ಮೊರೆ ಹೋಗುವುದಲ್ಲ. ಉತ್ತಮ ಫಲಿತಾಂಶಕ್ಕಾಗಿ ನಿರಂತರವಾಗಿ ಅನೇಕ ದಿನಗಳು ಅಥವಾ ವಾರಗಳೇ ಹಿಡಿಯಬಹುದು. ಕೆಲವು ದಿನಗಳ ನಂತರ ಮೊಡವೆಗಳು ಮಾಯವಾಗಿರುವುದು ಅಥವಾ ನಿಧಾನವಾಗಿ ಕೆಂಪುಬಣ್ಣದಿಂದ ಬಿಳಿ ಬಣ್ಣಕ್ಕೆ ತಿರುಗುತ್ತಿರುವುದು ನಿಮಗೆ ಕಂಡುಬರಬಹುದು ಅಥವಾ ಮೇಲೆ ಹೇಳಿದಂತೆ ಪ್ರತಿಯೊಬ್ಬರ ಚರ್ಮದ ಗುಣಲಕ್ಷಣಗಳು ಬೇರೆ ಬೇರೆಯಾಗಿರುವುದರಿಂದ ಮುಖದ ಚರ್ಮಕ್ಕೆ ಬೇರೆ ಏನಾದರೂ ಸಮಸ್ಯೆ ಉಂಟಾಗುವ ಸಂಭವ ಕಂಡುಬಂದಲ್ಲಿ ಅಥವಾ ಮೊಡವೆಗಳು ತೀವ್ರ ಸ್ವರೂಪ ತಾಳಿದಲ್ಲಿ ಬಾಳೆಹಣ್ಣಿನ ಸಿಪ್ಪೆಯ ಮಸಾಜ್ ಅನ್ನು ನಿಲ್ಲಿಸಿ ಚರ್ಮಕ್ಕೆ ಸ್ವಲ್ಪ ದಿನಗಳ ಕಾಲ ವಿಶ್ರಾಂತಿ ಕೊಡಿ ಅಥವಾ ಕೂಡಲೇ ಚರ್ಮ ವೈದ್ಯರನ್ನು ಭೇಟಿಯಾಗಿ.

ಚರ್ಮದ ಆರೈಕೆಗೆ ಬಾಳೆಹಣ್ಣು ಸಹಕಾರಿ..!!
ಸುಕ್ಕುಗಟ್ಟಿದ ಚರ್ಮಕ್ಕೆ ಅಥವಾ ಒಡೆದ ಹಿಮ್ಮಡಿಗೆ ಬಾಳೆಹಣ್ಣಿನ ಲೇಪನ ಹಿಂದಿನ ಕಾಲದಲ್ಲಿ ಚರ್ಮದ ಸುಕ್ಕು ಮತ್ತು ಹಿಮ್ಮಡಿ ಒಡೆದಿರುವುದು ಕೇವಲ ವಯಸ್ಸಾದ ಅಜ್ಜ-ಅಜ್ಜಿಯರಲ್ಲಿ ನೋಡುತ್ತಿದ್ದೆವು. ಆದರೆ ಈಗಿನ ದಿನಗಳಲ್ಲಿ ಸುಕ್ಕುಗಟ್ಟಿದ ಚರ್ಮ ಕೇವಲ ವಯಸ್ಸಾದವರಲ್ಲಿ ಮಾತ್ರ ಕಂಡುಬರುವುದಿಲ್ಲ. ಪೋಷಕಾಂಶದ ಕೊರತೆಯಿಂದ ಮಕ್ಕಳಲ್ಲಿ ಅಥವಾ ಯುವಕ-ಯುವತಿಯರಲ್ಲಿ ಕೂಡ ಈ ಸಮಸ್ಯೆ ಅನೇಕರನ್ನು ಕಾಡುತ್ತಿರುತ್ತದೆ. ಹಿಮ್ಮಡಿಯ ಒಡಕೂ ಅಷ್ಟೇ. ಕೇವಲ ಚಳಿಗಾಲದಲ್ಲಿ ಮಾತ್ರವಲ್ಲದೆ ಶಾಶ್ವತವಾಗಿ ವಯಸ್ಕರ ಪಾದಗಳಲ್ಲಿ ಬಂದು ನೆಲೆಸುತ್ತದೆ. ಇದರಿಂದ ಬಹಳ ನೋವು ಮತ್ತು ಯಾತನೆ ಅನುಭವಿಸಬೇಕಾಗಿ ಬರುವುದಂತೂ ಸತ್ಯ . ಅಂತಹವರು ಮಾಗಿದ ಬಾಳೆಹಣ್ಣನ್ನು ಕಿವುಚಿ ಅದರ ಪೇಸ್ಟ್ ಅನ್ನು ಸುಕ್ಕುಗಟ್ಟಿದ ಚರ್ಮಕ್ಕೆ ಮತ್ತು ಒಡೆದ ಹಿಮ್ಮಡಿಯ ಭಾಗಕ್ಕೆ ಲೇಪಿಸಿ ಸ್ವಲ್ಪ ಸಮಯದವರೆಗೆ ಹಾಗೆ ಬಿಡಿ. ಬಾಳೆಹಣ್ಣಿನಲ್ಲಿರುವ ವಿಟಮಿನ್ ‘ ಇ ‘ ಇಲ್ಲಿ ಒಂದು ಔಷಧದಂತೆ ಕೆಲಸ ಮಾಡುತ್ತದೆ ಮತ್ತು ಕ್ರಮೇಣವಾಗಿ ಈ ಎರಡೂ ಸಮಸ್ಯೆಗಳನ್ನು ನಿಮ್ಮಿಂದ ದೂರ ಮಾಡುತ್ತದೆ.

ತರಿತರಿಯಾದ ಸ್ಕ್ರಬ್ ಹೀಗೆ ತಯಾರು ಮಾಡಿ.!!
ಒಂದು ಮಾಗಿದ ಬಾಳೆಹಣ್ಣನ್ನು ತೆಗೆದುಕೊಂಡು ಅದನ್ನು ಒಂದು ಬಟ್ಟಲಿನಲ್ಲಿ ಹಾಕಿ ಅದು ದ್ರವರೂಪಕ್ಕೆ ಬರುವವರೆಗೂ ಚೆನ್ನಾಗಿ ಮ್ಯಾಶ್ ಮಾಡಿ. ನಂತರ ಅದಕ್ಕೆ 1 ಟೇಬಲ್ ಚಮಚ ( 14.8 ಎಂ.ಎಲ್ ) ದಷ್ಟು ಸಕ್ಕರೆ ಅಥವಾ 2 – 3 ಟೇಬಲ್ ಚಮಚ ( 29.6 – 44.4 ಎಂ.ಎಲ್ ) ದಷ್ಟು ಓಟ್ ಅಥವಾ ತೋಕೆ ಗೋಧಿಯನ್ನು ಹಾಕಿ ಚೆನ್ನಾಗಿ ಮಿಶ್ರಣ ಮಾಡಿ. ಈ ರೀತಿಯ ಮಿಶ್ರಣ ನಿಮ್ಮ ಚರ್ಮಕ್ಕೆ ಹಚ್ಚಲು ಸುಲಭ ಮತ್ತು ಹಾಳಾಗುತ್ತಿರುವ ಚರ್ಮ ಕೋಶಗಳನ್ನು ನಿಧಾನಿಸುತ್ತದೆ. ಈ ಮಿಶ್ರಣವನ್ನು ಉಗುರು ಬೆಚ್ಚಗಿನ ನೀರಿನೊಂದಿಗೆ ನೆನೆಸಿ ಮಾಯಿಸ್ಚರೈಸರ್ ನ ಸಹಾಯದೊಂದಿಗೆ ನಿಧಾನವಾಗಿ ನಿಮ್ಮ ಚರ್ಮದ ಮೇಲೆ ವೃತ್ತಾಕಾರವಾಗಿ ಹಚ್ಚಿ. ತರಿತರಿಯಾಗಿರುವ ಕಾರಣ ಇಲ್ಲೂ ಸಹ ಒರಟುತನ ಬೇಡ. ಇದರಿಂದ ಚರ್ಮ ಇನ್ನಷ್ಟು ಹಾಳಾಗುತ್ತದೆ.

ಬಾಳೆಹಣ್ಣಿನಿಂದ ಮುಖಕ್ಕೆ ಮಾಯಿಶ್ಚರೈಸಿಂಗ್ ಫೇಸ್ ಪ್ಯಾಕ್ ಮಾಡಿ
ಈ ಫೇಸ್ ಪ್ಯಾಕ್ ಅನ್ನು ಬಹಳ ಸುಲಭವಾಗಿ ಮತ್ತು ಅತ್ಯಂತ ಕಡಿಮೆ ಸಮಯದಲ್ಲಿ ಮಾಡಬಹುದು. *1 ಮಾಗಿದ ಬಾಳೆಹಣ್ಣನ್ನು ತೆಗೆದುಕೊಂಡು ಒಂದು ಫೋರ್ಕ್‌ನ ಸಹಾಯದಿಂದ ನೀರಿನಂತಾ ಗುವವರೆಗೂ ಅದನ್ನು ಚೆನ್ನಾಗಿ ಮ್ಯಾಶ್ ಮಾಡಿ. ಅದನ್ನು ಮುಖದ ಮೇಲೆ ನಿಧಾನವಾಗಿ ಸವರಿ 15 – 20 ನಿಮಿಷಗಳ ವರೆಗೆ ಹಾಗೆ ಬಿಡಿ. ಈ ಫೇಸ್ ಪ್ಯಾಕ್ ನಿಂದ ನಿಮಗೆ ಬೇರೆ ರೀತಿಯ ಉಪಯೋಗಗಳು ಬೇಕೆಂದರೆ ಈ ಕೆಳಗಿನವುಗಳಲ್ಲಿ ಯಾವುದನ್ನು ಬೇಕಾದರೂ ಜೊತೆಗೆ ಸೇರಿಸಿ.
ಅರಿಶಿನ ಪುಡಿ: ಇದರಲ್ಲಿ ಆಂಟಿ ಬ್ಯಾಕ್ಟೀರಿಯಲ್ ಗುಣ – ಲಕ್ಷಣವಿದ್ದು, ನಿಮ್ಮ ಚರ್ಮ ಯಾವುದೇ ಸೋಂಕಿಗೆ ಒಳಗಾಗದಂತೆ ನೋಡಿಕೊಳ್ಳುತ್ತದೆ.
ಬೇಕಿಂಗ್ ಪುಡಿ: ಚರ್ಮದಲ್ಲಿರುವ ಸಣ್ಣ ರಂಧ್ರಗಳನ್ನು ತೆರೆಯುವಂತೆ ಮಾಡಿ ಅಧಿಕವಾದ ಜಿಡ್ಡಿನ ಅಂಶವನ್ನು ನಿವಾರಿಸುತ್ತದೆ.
ನಿಂಬೆ ರಸ: ಅವನ್ನು ಹಗುರ ಗೊಳಿಸಿ ಹೊಳೆಯುವಂತೆ ಮಾಡುತ್ತದೆ.
ಜೇನು ತುಪ್ಪ: ಮೊಡವೆಗಳಿಗೆ ಕಾರಣವಾಗುವ ಬ್ಯಾಕ್ಟೀರಿಯಾಗಳನ್ನು ಕೊಲ್ಲುತ್ತದೆ.

ನಿಮ್ಮ ಕೂದಲಿಗೆ ಬಾಳೆಹಣ್ಣು
ಬಾಳೆಹಣ್ಣಿನ ಉಪಯೋಗ ಕೇವಲ ಚರ್ಮಕ್ಕೆ ಮಾತ್ರವಲ್ಲ. ಚರ್ಮದ ಮೇಲಿರುವ ಕೂದಲಿಗೂ ಅಷ್ಟೇ ಸಹಕಾರಿ. ಕೆಲವರು ಒಣಚರ್ಮದ ಸಮಸ್ಯೆಯಿಂದ ಬಳಲುತ್ತಿರುತ್ತಾರೆ. ಅಂತಹವರು ಒಂದೆರಡು ಬಾಳೆಹಣ್ಣುಗಳನ್ನು ತೆಗೆದುಕೊಂಡು ಅದನ್ನು ಚೆನ್ನಾಗಿ ಮ್ಯಾಶ್ ಮಾಡಿ ಅದಕ್ಕೆ ಒಂದು ಟೇಬಲ್ ಚಮಚದಷ್ಟು ಜೇನುತುಪ್ಪ ಅಥವಾ ಕೆಲವು ಹನಿಗಳಷ್ಟು ಬಾದಾಮಿ ಎಣ್ಣೆಯನ್ನು ಹಾಕಿ ಚೆನ್ನಾಗಿ ಕಲಸಿ. ಇದನ್ನು ಮೊದಲೇ ನೆನೆದಿರುವ ನಿಮ್ಮ ಕೂದಲಿಗೆ ಲೇಪನ ಮಾಡಿ 15 ನಿಮಿಷ ಹಾಗೆ ಬಿಡಿ. ನಂತರ ಶುದ್ಧವಾದ ನೀರಿನಿಂದ ತೊಳೆದುಕೊಳ್ಳಿ. ಇಲ್ಲಿ ಬಾಳೆಹಣ್ಣು, ಜೇನುತುಪ್ಪ ಮತ್ತು ಬಾದಾಮಿ ಎಣ್ಣೆ ಹಾಳಾಗುತ್ತಿರುವ ಅಥವಾ ಒಣ ಕೂದಲಿಗೆ ತೇವಾಂಶವನ್ನು ಒದಗಿಸುತ್ತವೆ…. ನೋಡಿದಿರಲ್ಲ, ನಿಮ್ಮ ದೇಹಕ್ಕೆ ಅಡಿಯಿಂದ ಮುಡಿಯವರೆಗೂ ಬಾಳೆಹಣ್ಣು ಮತ್ತು ಅದರ ಸಿಪ್ಪೆಯಿಂದ ಆಗುವ ಅದ್ಭುತ ಪ್ರಯೋಜನಗಳನ್ನು. ಇನ್ನು ಮುಂದೆಯಾದರೂ ಬಾಳೆಹಣ್ಣು ತಿಂದು ಸಿಪ್ಪೆ ಬಿಸಾಡುವ ಬದಲು ಈ ರೀತಿ ಉಪಯೋಗಿಸಿದರೆ ಬಹಳ ಉತ್ತಮ.

Leave a Reply

Your email address will not be published. Required fields are marked *